Эркаклар аксессуарлари аёлларникига қараганда унчалик турли-туман эмас. Шунга қарамасдан, ҳатто энг кам миқдордаги аксессуарлар орасидан ўзига мосини танлашни ҳар қандай эркак ҳам уддалайвермайди. Кўпчиликни қайси либосни қайси акссесуар билан бирга кийиш масаласи ўйлантириб қўяди. Айнан шунинг учун эркаклар образнинг ушбу таркибий қисмига эътибор қаратишмайди.

 

Камар эркакларнинг ҳеч нарса билан алмаштириб бўлмайдиган аксессуари ҳисобланади. Камар танлаш жуда осон. Аксессуарнинг ранги пойабзал ёки соат қайишига мос тушиши керак. Ҳозир замш фактурадан тайёрланган кўк, жигарранг ва классик қора ранглардаги камарлар урф бўлган. Михпарчинли ва йирик тўқали камарлар долзарблик касб этмоқда. Бундай услубий аксессуарлар жинси ва кедалар билан жуда мос тушади.

 

Муҳимлиги бўйича эмас, балки ҳисоби бўйича иккинчи аксессуар – бу соат. Сифатли ва чиройли соатлар ўзининг соҳиби ҳақида ҳар қандай сўзлардан кўра яхшироқ ҳикоя қила олади. Айни пайтда думалоқ циферблатли чарм қайишли соатлар урф бўлган. Ушбу мавсумда металл вариантлар ҳам долзарб бўлиб, уларни жиддий офис костюми билан ҳам, casual услубидаги либослар билан ҳам тақиш мумкин.

Эркаклар галстукни ёқтирадиган ва уни хуш кўрмайдиганларга ажралади. Шунга қарамасдан, ҳар бир эркакнинг гардеробида бир нечта галстук мавжуд бўлади. Ушбу буюмни кўйлакка мослаб олиш зарур, унинг нақшига ҳам алоҳида эътибор қаратиш керак. Ёрқин ранглардаги кўйлакларга бир хил нейтрал рангдаги галстук мос келади ва, аксинча. Ушбу мавсумда ўртача узунликдаги ва монохром палитрадаги галстуклар урф бўлган. 
 

Кўзойнак танлаш эркаклар учун мураккаб бўлган вазифалардан бири ҳисобланади. Мавсум тренди – авиатор-кўзойнаклар. Бундай шакл кўпчиликка мос тушади ҳамда башанг ва мардонавор образни яратади. Кўзойнак гардиши ва шишасининг ранги дидингизга қараб ўзгариши мумкин.

Галстук учун қисқичлар ва илматугмани ҳамма эркаклар ҳам тақавермайди. Аммо бу ишбилармон киши образини яратишда муҳим деталь ҳисобланади. Мазкур аксессуарлар битта металлдан тайёрланган бўлиши лозим. Уларни яхшиси бир тўпламда харид қилган маъқул. Ҳозир металлик ранги ва оддий геометрик шакллар урфда.

Башанг ва дид билан кийиниш унчалик мураккаб эмас, асосийси эътиборни майда бўлиб кўринган нарсаларга қаратиш.